Hoʻohanohano ʻo Cierra Mei-Ling hauʻolimaikalani Pagaduan Chow iā Hiʻiakaikapoliopele me ka hula ʻo “ʻO Lauliʻa ke Aliʻi.” He ʻōlapa ʻo Cierra ma lalo o Kumu Hula Kamaka Kukona.
He mele ʻo Lauliʻa ke Aliʻi no loko mai o ka moʻokaʻao o Hiʻiakaikapoliopele e helu papa ana i nā inoa he nui o Hiʻiaka i pili i kona mau kino lau o ke ao kūloheohe. Ma kekahi mana o ka moʻolelo, oli aku ana ʻo Hōpoe, kā Hiʻiaka aikane, i kēia mele pihaʻū i ia mau inoa o Hiʻiaka i mea e pākele ai i ka ʻena a Pele.
Ua ahuwale iā Pele ka pili maoli o Hōpoe me Hiʻiaka ma ka wali loa o ia mau inoa Hiʻiaka iā Hōpoe. Hoʻomau aku nō ʻo Pele i ka ʻai honua a koe mai ana naʻe o Hōpoe, ua ola nō.
